Galicia, no noroeste de España, é coñecida como unha terra verde, definida polos seus ríos, o seu mar, a néboa e as múltiples palabras coas que nomeamos a choiva. Porén, nas últimas décadas, esta paisaxe verde convive cada vez máis co gris das cinzas. Galicia, xunto coa súa veciña Portugal, converteuse nunha das rexións con maior incidencia de incendios forestais en Europa.

En 2022, aldeas enteiras das provincias de Ourense e Lugo quedaron reducidas a cinza, mentres que a serra da Culebra, en Zamora, foi arrasada. En 2024, Portugal perdeu máis de 135.000 hectáreas e morreron sete persoas. Estas cifras ilustran unha realidade urxente: o interior do noroeste peninsular, un dos maiores baleiros demográficos da rexión, sofre o impacto destes incendios de forma especialmente dura.

Terra Queimada é un proxecto que busca ser testemuño e xerar conciencia sobre esta problemática, enraizada no abandono do territorio, no quecemento global e no cambio climático. Dende que comecei a miña carreira como fotoxornalista, documentei os incendios forestais que, cada verán, consomen a nosa terra. Durante máis dunha década, fotografei estes eventos extremos para preservar a súa memoria, analizar as súas causas e transmitir a urxencia de actuar.